«Ուկրաինան անօդաչու սարքերով հարձակում է գործել Մոսկվայի վրա». Անդրեյ Վորոբյով

Մոսկվայում և Մերձմոսկովյան շրջանում անօդաչու թռչող սարքերի հարձակման հետևանքով կա զոհ և վիրավորներ, հայտնել է Մոսկվայի մարզի նահանգապետ Անդրեյ Վորոբյովը՝ Telegram-ի իր ալիքում։
«Այսօր առավոտյան ժամը 4-ին ԱԹՍ-ների զանգվածային հարձակում է իրականացվել Մոսկվայի և Մերձմոսկովյան շրջանի ուղղությամբ: Այս պահին հայտնի է, որ մեկ մարդ մահացել է, երեքը՝ վիրավորվել Լենինսկի քաղաքային շրջանում (Վիդնոյե քաղաք) և Դոմոդեդովոյում»,- գրել է նա։

Վորոբյովը պարզաբանել է, որ Ռամենսկոեում ԱԹՍ-ների բեկորներն ընկել են բնակելի շենքի վրա, որտեղ վնասվել է առնվազն յոթ բնակարան։

Ավելի վաղ Մոսկվայի քաղաքապետ Սերգեյ Սոբյանինը հայտնել էր, որ ՀՕՊ ուժերը ոչնչացրել են մայրաքաղաքի ուղղությամբ թռչող 69 անօդաչու թռչող սարքեր։

Ռոսավիացիայից հաղորդել են, որ Դոմոդեդովո, Շերեմետևո, Վնուկովո և Ժուկովսկի օդանավակայաններում սահմանափակումներ են մտցվել։

Միաժամանակ հաղորդվում է, որ ժամանակավորապես երկու ուղղություններով դադարեցվել է գնացքների երթևեկությունը «Դոմոդեդովո» երկաթուղային կայարանով։