«Պուտինը «ոչ» չի ասում, բայց անհնար է դարձնում որոշումները»․ Զելենսկի

Վլադիմիր Պուտինը փաստացի պատրաստվում է մերժել 30-օրյա հրադադարի մասին ԱՄՆ-ի առաջարկը։ Այս մասին հայտարարել է Ուկրաինայի նախագահ Վլադիմիր Զելենսկին։

«Այժմ բոլորս Ռուսաստանից լսեցինք շատ կանխատեսելի, շատ մանիպուլյատիվ խոսքեր՝ ի պատասխան ճակատում հրադադար հաստատելու գաղափարին։ Պուտինն, իհարկե, վախենում է ուղիղ ասել նախագահ Թրամփին, որ ցանկանում է շարունակել այս պատերազմը, որ ուզում է սպանել ուկրաինացիներին»:

Զելենսկու խոսքով՝ Պուտինը հաճախ է դիմում նմանատիպ մարտավարության։ Ռուսաստանի նախագահն ուղղակիորեն «ոչ» չի ասում, այլ դիմում է գործողությունների, որոնք ձգձգում են ամեն ինչ և անհնարին դարձնում նորմալ որոշումները։

«Ուկրաինան իրավիճակը բարդացնող պայմաններ չի դնում: Դա անում է Ռուսաստանը: Նրանց պատերազմ է պետք»,- հայտարարել է Վլադիմիր Զելենսկին:

Սաուդյան Արաբիայում բանակցություններից հետո հայտնի էր դարձել, որ Ուկրաինան համաձայնել է 30-օրյա հրադադարի մասին ԱՄՆ-ի առաջարկին, եթե Ռուսաստանը նույնպես գնա նույն քայլին։

Մարտի 13-ին Պուտինը հայտարարել է, որ դեմ չէ հրադադարին, սակայն պահանջել է, որ Ուկրաինան դադարեցնի զինվորականների մոբիլիզացումը և վերապատրաստումը, ինչպես նաև զենք չստանա իր դաշնակիցներից։