Իրանական հրթիռները պատրաստ են արձակման՝ ԱՄՆ-ի կողմից էսկալացիայի դեպքում․ #TehranTimes

Իրանի ողջ տարածքում հրթիռները գտնվում են մարտական պատրաստության վիճակում և կգործարկվեն՝ Միացյալ Նահանգների կողմից էսկալացիայի դեպքում, հաղորդում է Tehran Times թերթը՝ վկայակոչելով իր աղբյուրներին:
Tehran Times-ի փոխանցմամբ՝ իրանական հրթիռները ստորգետնյա բազաներ ունեցող բոլոր քաղաքների արձակման կայաններում լիցքավորվել են և պատրաստ են արձակման: «Պանդորայի արկղը բացելը թանկ կարժենա ԱՄՆ կառավարության և նրա դաշնակիցների համար»,- նշում է լրատվամիջոցը:

Ավելի վաղ Telegraph թերթը, հղում կատարելով իրանցի բարձրաստիճան պաշտոնյային, հայտնել էր, որ Թեհրանը պատրաստ է հարվածել Հնդկական օվկիանոսում գտնվող Դիեգո Գարսիա ամերիկյան բազային՝ ԱՄՆ-ի հարձակման դեպքում։

Կիրակի ԱՄՆ նախագահ Դոնալդ Թրամփը NBC News-ին տված հարցազրույցում սպառնացել էր «աննախադեպ ռմբակոծություններ», եթե ԱՄՆ-ն ու Իրանը համաձայնության չգան։

Իրանի ԱԳ նախարար Աբբաս Արաղչին ավելի վաղ հայտարարել էր, որ առավելագույն ճնշման, ռազմական և տնտեսական սպառնալիքների ֆոնին Իրանը երբեք չի գնա ԱՄՆ-ի հետ ուղիղ բանակցությունների։