«Մասկը կմնա ԱՄՆ վարչակազմում»․ Վենս

Իլոն Մասկը, ով վերահսկում է ԱՄՆ Կառավարության արդյունավետության դեպարտամենտի (DOGE) աշխատանքը, դեռ չի ավարտել իր աշխատանքն ամերիկյան վարչակազմում և կծառայի որպես վարչակազմի խորհրդական։ Այս մասին հայտարարել է ԱՄՆ փոխնախագահ Ջ.Դ.Վենսը։

«Դրանք բացարձակապես կեղծ լուրեր են», - Մասկի՝ պաշտոնից հեռանալու մասին ԶԼՄ-ների հաղորդումներին ի պատասխան Fox News-ին հայտնել է Վենսը:

«Իլոնը միացավ ԱՄՆ վարչակազմին, և մենք նրան ասացինք, որ պետք է կրճատել աննախադեպ զանգվածային բյուրոկրատիան, որը հակասում է ամերիկացի ժողովրդի կամքին և շատ թանկ արժե: Մենք ասացինք, որ դրա համար վեց ամիս կպահանջվի, և նա համաձայնեց, բայց, իհարկե, նա կշարունակի աշխատել որպես խորհրդական, և, ի դեպ, DOGE-ը դեռ շատ անելիք ունի», նշել է ԱՄՆ փոխնախագահը:

«Իլոնը կմնա ոչ միայն իմ ընկերը, այլև խորհրդականը՝ և՛ իմ, և՛ նախագահի», հավելել է նա:

Ավելի վաղ Politico-ն հայտնել էր, որ Թրամփն իր մերձավոր շրջապատին հայտնել է, որ Մասկն առաջիկա շաբաթներին կհեռանա պաշտոնից։