«Համբերության դեպքում Աբխազիան և Օսիան հնարավոր է վերադարձնել»․ Կոբախիձե

Վրաստանի տարածքային ամբողջականության վերականգնումը հնարավոր է, հայտարարել է Վրաստանի վարչապետ Իրաքլի Կոբախիձեն «Իմեդի» հեռուստաալիքին տված հարցազրույցում։

Ըստ Կոբախիձեի՝ Աբխազիայի և Օսիայի հետ վերամիավորումն իրական կդառնա, եթե Թբիլիսին համբերություն ցուցաբերի և «մենք մեր քաղաքականության մեջ առաջնորդվենք այդ համբերությամբ»։

«Այս հարցի լուծումն, իհարկե, կախված կլինի տարբեր գործոններից, սակայն համբերատարության և ճիշտ քաղաքականության դեպքում ամեն ինչ հնարավոր է»,- ասել է Կոբախիձեն:

Աշնանն իշխող «Վրացական երազանք» կուսակցության գործադիր քարտուղար Մամուկա Մդինարաձեն հայտարարել էր, որ Թբիլիսին, «հակառակ շրջանառվող լուրերի, չի պատրաստվում դառնալ համադաշնություն և ճանաչել Աբխազիայի և Հարավային Օսիայի անկախությունը։ Նման պարագայում իշխանությունները կասկածի տակ կդնեին պետության տարածքային ամբողջականությունը»,- նշել էր Մդինարաձեն։ Նրա խոսքով՝ երկրի վերամիավորումը երազանք է, որն «անպայման կիրականանա»։