ԱՄՆ-ն Եմենում վերացրել է հութիների հրամանատարին. Al Arabiya

Եմենի ապստամբ «Անսար Ալլահ» շարժման հութիների դաշտային հրամանատար Աբու Աբդուլլահ ալ-Համրանն սպանվել է Սաադա նահանգում ԱՄՆ-ի վերջին հարվածի արդյունքում: Այսպիսի հայտարարություն է արել Al Arabiya հեռուստաալիքը՝ վկայակոչելով աղբյուրներին։

Նրանց խոսքով՝ ալ-Համրանն զբաղեցրել է Սաադա նահանգի փոխնահանգապետի պաշտոնը և ստանձնել է «Անսար Ալլահ»-ի ուժերի հրամանատարությունը տարածաշրջանում։ Դեպքը տեղի է ունեցել անցած շաբաթ: Հարձակման ընթացքում սպանվել են նաև նրան ուղեկցողներից մի քանիսը, այդ թվում՝ հութիների տարածաշրջանային կրթության վարչության ղեկավարը:

Մարտի 15-ից Միացյալ Նահանգները նախագահ Դոնալդ Թրամփի հրամանով սկսեց զանգվածային հարվածներ հասցնել հութիների թիրախներին, որոնք վերահսկում են Եմենի տարածքի մոտ մեկ երրորդը։ Ինչպես հայտարարել են ԱՄՆ-ի կենտրոնական հրամանատարությունից, գործողությունն ուղղված է ամերիկյան շահերի պաշտպանությանն ու նավարկության ազատության ապահովմանը։ Ի պատասխան՝ «Անսար Ալլահ»-ը մի շարք հարձակումներ է իրականացրել Կարմիր ծովի հյուսիսում գտնվող ամերիկյան «Հարի Թրումեն» ավիակիրի վրա՝ օգտագործելով հրթիռներ և անօդաչու սարքեր: Հարվածների հետևանքով նավի վնասման մասին տեղեկություններ չկան։