ԱՄՆ-ն հարվածել է Եմենի նավթային նավահանգստին․ կա 33 զոհ

ԱՄՆ-ն օդային հարվածներ է հասցրել Եմենի Ռաս Իսա նավթային նավահանգստին՝ Կարմիր ծովի ափին գտնվող Ալ-Հոդեյդա նահանգում, հայտնել է ԱՄՆ Կենտրոնական հրամանատարությունը:

«ԱՄՆ ուժերը միջոցներ են ձեռնարկել խափանելու Իրանի կողմից աջակցություն ստացող հութի ահաբեկիչների վառելիքի այս աղբյուրը և զրկելու նրանց ապօրինի եկամուտներից, որոնցով ավելի քան մեկ տասնամյակ ֆինանսավորում էին հութիների ահաբեկչական ջանքերը ողջ տարածաշրջանում», - ասվում է Կենտրոնական հրամանատարության X-ում տարածած հայտարարության մեջ:

Հաղորդվում է, որ նավերը շարունակում էին վառելիք մատակարարել այս նավահանգստի միջոցով՝ հակառակ նրան, որ ԱՄՆ-ն հութիներին օտարերկրյա ահաբեկչական կազմակերպություն է հայտարարել:

Ինչպես հայտնում է Al Mayadeen-ը, օդային հարվածների պատճառով Ռաս Իսա նավահանգիստը հրդեհվել է։ Եմենի առողջապահության նախարարության վերջին տվյալներով՝ զոհվել է 33 մարդ, վիրավորվել՝ 80-ը։