Օմանում ավարտվել է Իրան-ԱՄՆ բանակցությունների երրորդ փուլը

Օմանում ավարտվել է ԱՄՆ-Իրան միջուկային ծրագրի շուրջ բանակցությունների երրորդ փուլը․ հաղորդում է ISNA պետական ​​լրատվական գործակալությունը։

Օմանի մայրաքաղաք Մասկատում տեղի են ունեցել Իրանի և ԱՄՆ-ի տեխնիկական խմբերի միջև խորհրդակցություններ, ինչպես նաև երկու երկրների միջև բանակցությունների երրորդ փուլը:

Ամերիկյան պատվիրակությունը գլխավորում էր Մերձավոր Արևելքի հարցերով ԱՄՆ նախագահի հատուկ ներկայացուցիչ Սթիվ Ուիթքոֆը, իսկ իրանական պատվիրակությունը՝ արտգործնախարար Աբբաս Արաղչին։

Իրանի ԱԳ նախարարը բանակցությունները որակել է որպես կառուցողական և հանգիստ, և շնորհակալություն հայտնել Օմանի արտգործնախարարին՝ իրանական և ամերիկյան պատվիրակությունների միջև կարծիքների փոխանակման գործում ներդրած ջանքերի համար։

Բանակցությունները կշարունակվեն հաջորդ շաբաթ, իսկ բարձր մակարդակի հանդիպումը նախատեսված է մայիսի 3-ին․ հայտնել է Օմանի արտաքին գործերի նախարարությունը։

Ապրիլի 19-ին Հռոմում տեղի էր ունեցել Իրանի և ԱՄՆ-ի միջև բանակցությունների երկրորդ փուլը՝ Օմանի միջնորդությամբ։ Քննարկվել էր խաղաղ նպատակներով միջուկային էներգիայի զարգացման հարցը: