«Հրադադարը չպետք է մի քանի օրով լինի»․ Զելենսկի

Ուկրաինան պատրաստ է աշխատել բոլոր գործընկերների հետ՝ պատերազմը դադարեցնելու համար, սակայն Ռուսաստանը մերժում է ամեն ինչ և մանիպուլյացիայի է ենթարկում աշխարհին՝ փորձելով խաբել Միացյալ Նահանգներին։ Այս մասին հայտարարել է Ուկրաինայի նախագահ Վլադիմիր Զելենսկին՝ արձագանքելով Ռուսաստանի նախագահ Վլադիմիր Պուտինի՝ Հաղթանակի օրվա կապակցությամբ քառօրյա հրադադարի մասին հայտարարությանը։

«Սա մանիպուլյացիայի հերթական փորձն է. ինչ-ինչ պատճառներով բոլորը պետք է սպասեն մինչև մայիսի 8-ը և միայն այդ դեպքում դադարեցնեն կրակը, որպեսզի շքերթի ժամանակ Պուտինի համար լռություն ապահովեն»,- ասել է Զելենսկին։

«Մենք կարևորում ենք մարդկային կյանքերը, այլ ոչ թե շքերթները։ Ահա թե ինչու ենք կարծում, և աշխարհն է այդպես կարծում, որ մայիսի 8-ին սպասելու կարիք չկա։ Կրակը պետք է դադարի ոչ թե մի քանի օրով, այլ պետք է լինի անհապաղ, լիակատար և անվերապահ՝ առնվազն 30 օրով, որպեսզի այն երաշխավորված և հուսալի լինի»,- հայտարարել է Զելենսկին։

Նախօրեին ՌԴ նախագահ Պուտինը Հայրենական մեծ պատերազմում հաղթանակի 80-ամյակի կապակցությամբ հրադադար էր հայտարարել, որը կտևի մայիսի 7-ից մինչև մայիսի 11-ը։ Պուտինն ուկրաինական կողմին կոչ էր արել «հետևել այս օրինակին»։