«Գազայում թերսնման պատճառով ավելի քան 65 000 երեխա է հոսպիտալացվել». #AlMasirah

Գազայի հատվածում Իսրայելի կողմից շարունակվող շրջափակման պայմաններում ավելի քան 65,000 երեխա հոսպիտալացման կարիք է ունեցել՝ ծանր թերսնման պատճառով։ Այս մասին հայտնել է «Al Masirah» հեռուստաալիքը՝ հղում անելով Գազայի կառավարության հասարակայնության հետ կապերի վարչությանը։

Հեռուստաալիքը հայտնում է, որ ամեն օր սովից տառապող 1.1 միլիոն պաղեստինցի երեխաներից և դեռահասներից ավելի քան 65,000-ը հոսպիտալացվել են՝ սուր թերսնման պատճառով։

Ավելի վաղ Մերձավոր Արևելքում պաղեստինցի փախստականների օգնության և աշխատանքների գործակալությունն (UNRWA) ուշադրություն էր հրավիրել Գազայի հատվածում ստեղծված ծանր իրավիճակի վրա՝ պայմանավորված Իսրայելի կողմից մարտի 2-ից ուժի մեջ մտած մարդասիրական օգնության մատակարարման արգելքով։

«Անկլավում սովը տարածվում է և խորանում, այն միտումնավոր է և մարդածին։ Գազան վերածվել է հուսահատության վայրի»,- X-ում գրել է UNRWA-ի հանձնակատար գեներալ Ֆիլիպ Լազարինին։

Մարտի 2-ին Իսրայելի վարչապետ Բենիամին Նեթանյահուն հայտարարել էր Գազայի հատված մարդասիրական օգնությունը դադարեցնելու և բոլոր անցակետերը փակելու մասին։

Իսրայելական կողմի պնդմամբ՝ սա արվել է պաղեստինյան «ՀԱՄԱՍ» շարժման կողմից ԱՄՆ հատուկ բանագնաց Սթիվ Ուիթքոֆի՝ անկլավում հրադադարի ռեժիմը երկարաձգելու առաջարկը չընդունելու պատճառով։