«Ուկրաինան չի գնա խաղաղության՝ ցանկացած գնով»․ Սիբիհան կարմիր գծեր է թվարկել

Ռուսաստանը, ինչպես և որևէ այլ երկիր, չունի և չի ունենա վետոյի իրավունք ՆԱՏՕ-ին անդամակցելու մեր ընտրության վրա։ Այս մասին հայտարարել է Ուկրաինայի ԱԳ նախարար Անդրեյ Սիբիհան՝ Ուկրաինայի Գերագույն ռադայում։

Նա ընդգծել է, որ Ուկրաինան չի ընդունի որևէ սահմանափակում Ուկրաինայի ինքնիշխանության, ներքին և արտաքին քաղաքականության, մասնավորապես՝ այն միությունների և դաշինքների ընտրության հարցում, որոնց երկիրը ձգտում է միանալ։

«Այո, մենք կարող ենք այժմ կոնսենսուս չունենալ ՆԱՏՕ-ին անդամակցության հարցում, բայց մենք կշարունակենք ակտիվորեն աշխատել դրան հասնելու համար։ Սակայն Ռուսաստանը, ինչպես և որևէ այլ երկիր, չունի և չի ունենա վետոյի իրավունք մեր ընտրության վրա», - ընդգծել է Սիբիհան։

Նախարարի խոսքով՝ Ուկրաինան պատրաստ է անվերապահորեն դադարեցնել կրակը։

«Ռուսաստանը չէ պատրաստ և ձգտում է պատերազմի։ Ուկրաինան չի գնա, այսպես կոչված, խաղաղության՝ ցանկացած գնով։ Խաղաղության պայմանների վերաբերյալ մեր երկրի հիմնարար դիրքորոշումները մնում են հստակ և անփոփոխ։ Նախ, մենք չենք համաձայնի որևէ ժամանակավորապես օկուպացված տարածք ճանաչել որպես ռուսական։ Երկրորդ, մենք չենք համաձայնի որևէ սահմանափակման՝ Ուկրաինայի պաշտպանության ուժերի թվաքանակի, կառուցվածքի և այլ բնութագրերի, պաշտպանական արդյունաբերության, դաշնակիցների ռազմական օգնության կամ մեր տարածքում նրանց զորքերի ներկայության վերաբերյալ հարցերում»,- նշել է Սիբիհան։