«Զելենսկին մանրամասնել է՝ ինչ են խոսել Թրամփի հետ Վատիկանում». #Reuters

Ուկրաինայի նախագահ Վլադիմիր Զելենսկին հայտարարել է, որ Վատիկանում Հռոմի պապ Ֆրանցիսկոսի հուղարկավորության արարողության ժամանակ Դոնալդ Թրամփի հետ քննարկել են հակաօդային պաշտպանության համակարգերի և Ռուսաստանի նկատմամբ պատժամիջոցների վերաբերյալ հարցեր։ Այս մասին հայտնել է Reuters-ը:

Զելենսկու խոսքով՝ դա ԱՄՆ նախագահի հետ երբևէ ունեցած իր լավագույն հանդիպումն էր։
Զելենսկին հայտնել է, որ ինքը և Թրամփը համամիտ են այն հարցում, որ Կիևի և Մոսկվայի միջև 30-օրյա հրադադարն Ուկրաինայում պատերազմը դադարեցնելու ուղղությամբ առաջին ճիշտ քայլն է։

Զելեսկու փոխանցմամբ՝ ՌԴ-ի նկատմամբ պատժամիջոցների հարցում Թրամփի պատասխանը «շատ կոշտ» է եղել։ Զելենսկին մանրամասներ չի հայտնել։
Ուկրաինայի նախագահն անդրադարձել է նաև ԱՄՆ-ի հետ հանքային ռեսուրսների վերաբերյալ համաձայնագրին՝ նշելով, որ այն փոխշահավետ է և Ուկրաինային թույլ կտա պաշտպանել ԱՄՆ ապագա ներդրումները, ինչպես նաև իր սեփական տարածքն ու ժողովրդին։
Համաձայնագրի անվտանգության բաղադրիչի առումով Զելենսկին ընդգծել է առավել արդյունավետ օդային պաշտպանության կարևորությունը, որը ՌԴ-ի հետ պատերազմի երեք տարիների ընթացքում Կիևի հիմնական պահանջն էր դաշնակիցներից: