Պուտինը հաստատել է Ուկրաինայի հետ բանակցություններին մասնակցող պատվիրակության կազմը

ՌԴ նախագահ Վլադիմիր Պուտինը հաստատել է Ուկրաինայի հետ բանակցություններում ՌԴ-ն ներկայացնող պատվիրակության կազմը։ Հրամանագրի տեքստը հրապարակվել է Կրեմլի կողմից։

Բանակցային խմբի կազմում կլինեն Վլադիմիր Մեդինսկին՝ Ռուսաստանի նախագահի օգնական (պատվիրակության ղեկավար), Միխայիլ Գալուզինը՝ ԱԳ փոխնախարար, Իգոր Կոստյուկովը՝ Զինված ուժերի գլխավոր շտաբի գլխավոր վարչության պետ, Ալեքսանդր Ֆոմինը՝ Պաշտպանության փոխնախարար:

Ուկրաինան դեռևս չի հրապարակել իր պատվիրակության կազմը, սակայն, ըստ «Radio NV»-ի, երկիրը կներկայացնեն պաշտպանության նախարար Ռուստեմ Ումերովը, նախագահի աշխատակազմի ղեկավար Անդրեյ Երմակը, նախագահի դիվանագիտական ​​խորհրդական Իգոր Ժովկվան և ԱԳ նախարար Անդրեյ Սիբիհան։ Զելենսկին արդեն մեկնել է Անկարա։

Ստամբուլում բանակցությունները նախատեսված են Թուրքիայի նախագահի աշխատակազմի աշխատանքային գրասենյակում՝ Երևանի ժամանակով ժամը 11․00-ին։

Թուրքիայի նախագահ Ռեջեփ Թայիփ Էրդողանը և Վլադիմիր Զելենսկին կհանդիպեն Անկարայում. ըստ երևույթին, Էրդողանը չի պլանավորում հանդիպել ռուսական պատվիրակության հետ։

Բանակցություններին կարող են մասնակցել նաև ԱՄՆ պաշտոնյաներ, այդ թվում՝ պետքարտուղար Մարկո Ռուբիոն և ԱՄՆ նախագահի Մերձավոր Արևելքի հարցերով հատուկ ներկայացուցիչ Սթիվ Ուիթքոֆը։

Հիշեցնենք՝ ՌԴ նախագահ Վլադիմիր Պուտինն Ուկրաինայի նախագահ Վլադիմիր Զելենսկուն առաջարկել էր մայիսի 15-ին Ստամբուլում ուղիղ բանակցություններ սկսել Ուկրանայում հակամարտության կարգավորման շուրջ։

Զելենսկու գրասենյակից հայտնել էին, որ նախագահը չի մասնակցի Ստամբուլում կայանալիք բանակցություններին, եթե Պուտինն անձամբ ներկա չլինի։