Սթարմերը Պուտին-Թրամփ զրույցից առաջ Ուկրաինայի հարցը քննարկել է արևմտյան առաջնորդների հետ

Մեծ Բրիտանիայի վարչապետ Քիր Սթարմերը հեռախոսազրույց է ունեցել ԱՄՆ նախագահ Դոնալդ Թրամփի, Ֆրանսիայի նախագահ Էմանուել Մակրոնի, Գերմանիայի կանցլեր Ֆրիդրիխ Մերցի և Իտալիայի վարչապետ Ջորջիա Մելոնիի հետ, որի ընթացքում կողմերը քննարկել են Ուկրաինայում տիրող իրավիճակը։ Այս մասին հաղորդում է Reuters-ը՝ հղում կատարելով Սթարմերի գրասենյակի ներկայացուցչին։

Նշվում է, որ մայիսի 19-ին Ռուսաստանի նախագահ Վլադիմիր Պուտինի հետ Թրամփի հեռախոսազրույցից առաջ արևմտյան առաջնորդները «քննարկել են անվերապահ հրադադարի անհրաժեշտությունը» և Մոսկվային կոչ արել «լուրջ վերաբերվել խաղաղության բանակցություններին»։ Բացի այդ, նրանք հայտարարել են Ռուսաստանի դեմ նոր պատժամիջոցներ կիրառելու իրենց պատրաստակամության մասին, եթե Ռուսաստանի ղեկավարությունը «հրաժարվի լուրջ բանակցություններ վարել հրադադարի և խաղաղության շուրջ»։

Ավելի վաղ Թրամփը Truth Social սոցիալական ցանցում գրել էր, որ մայիսի 19-ին, ժամը 10:00-ին (Երևանի ժամանակով՝ 18:00-ին), զրույց կունենա Պուտինի հետ։ Թեմաների շարքում ԱՄՆ նախագահը նշել է ուկրաինական կարգավորման և առևտրի հետ կապված հարցերը։