Շաբաթ, 20 դեկտեմբերի, 2025 թ.
|
Ստեփանակերտում`   +5 °C

Ռուբիոն և Լավրովը հեռախոսազրույց են ունեցել

Ռուբիոն և Լավրովը հեռախոսազրույց են ունեցել
763
Հինգշաբթի, 29 մայիսի, 2025 թ., 10:16

ԱՄՆ պետքարտուղար Մարկո Ռուբիոն Մոսկվային կոչ է արել շարունակել երկխոսությունը Կիևի հետ։ Այս մասին նա հայտնել է ՌԴ ԱԳ նախարար Սերգեյ Լավրովի հետ հեռախոսազրույցի ժամանակ, ասվում է ԱՄՆ Պետդեպարտամենտի կողմից տարածված մամուլի հաղորդագրության մեջ։

«Պետքարտուղար Մարկո Ռուբիոն զրույց է ունեցել Ռուսաստանի արտգործնախարար Սերգեյ Լավրովի հետ։ Պետքարտուղարը ողջունել է անցյալ շաբաթ Ռուսաստանի և Ուկրաինայի միջև «1000-ը՝ 1000-ի դիմաց» ձևաչափով ռազմագերիների փոխանակումը։ Նա նաև վերահաստատել է Ուկրաինայի հետ կառուցողական և բարեխիղճ երկխոսության վերաբերյալ նախագահ Թրամփի կոչերը՝ որպես հակամարտությունը վերջ տալու միակ միջոց», - ասվում է հայտարարության մեջ։

Միաժամանակ ՌԴ ԱԳՆ հայտարարության մեջ նշվում է, որ Լավրովը Ռուբիոյին տեղեկացրել է, որ Մոսկվան պատրաստում է կոնկրետ առաջարկներ Կիևի հետ Ստամբուլում կայանալիք ուղիղ բանակցությունների հաջորդ փուլի համար։

Գերատեսչության փոխանցմամբ՝ Ռուբիոն ընդգծել է Դոնալդ Թրամփի՝ հակամարտության շուտափույթ կարգավորման ցանկությունը և հայտնել Վաշինգթոնի պատրաստակամությունը՝ նպաստելու կողմերի դիրքորոշումների մերձեցմանը։