«Իմ լիազորությունների ժամկետն ավարտվում է»․ Մասկ

ԱՄՆ կառավարության արդյունավետության դեպարտամենտի (DOGE) ղեկավար Իլոն Մասկը հայտարարել է, որ ԱՄՆ վարչակազմում իր լիազորությունների ժամկետն ավարտվում է։

«Քանի որ իմ՝ որպես կառավարության հատուկ աշխատակցի ժամկետը մոտենում է ավարտին, կցանկանայի շնորհակալություն հայտնել նախագահ Դոնալդ Թրամփին, ով ինձ հնարավորություն տվեց աշխատել անարդյունավետ ծախսերը կրճատելու ուղղությամբ», - գրել է նա իր X սոցիալական ցանցում։

«Կառավարության արդյունավետության դեպարտամենտի գործառույթը ժամանակի ընթացքում միայն կամրապնդվի, քանի որ այն կդառնա կենսակերպ կառավարության բոլոր ճյուղերում», - հավելել է Մասկը։

Նախօրեին Մասկը CBS-ին հայտնել էր, որ հիասթափված է հարկերի և բյուջեի մասին Թրամփի «մեծ ու գեղեցիկ» օրենքից։ Նրա կարծիքով, օրենքը խաթարում է ծախսերը կրճատելու ջանքերը և կհանգեցնի բյուջեի դեֆիցիտի աճի։

Մասկը նշանակվել էր «կառավարության հատուկ աշխատակից»՝ 130 օր ժամկետով։ Եթե հաշվենք Թրամփի՝ հունվարի 20-ի երդմնակալությունից, ապա այս ժամկետը լրանում է մայիսի վերջին։