Ցուցարարները ներխուժել են Նեթանյահուի գրասենյակ

Իսրայելում ցուցարարները մայիսի 28-ի երեկոյան հավաքվել էին Թել Ավիվի կենտրոնում՝ Իսրայելի վարչապետ Բենիամին Նեթանյահուի գլխավորած «Լիկուդ» կուսակցության տեղական գրասենյակի մոտ։ Ակցիան համընկել է Գազայում պատերազմի 600-րդ օրվա հետ, որը սկսվել էր 2023 թվականի հոկտեմբերի 7-ին՝ ՀԱՄԱՍ-ի զինյալների կողմից Իսրայելի վրա հարձակումից հետո։

Նեթանյահուի հակառակորդները, որոնք դեմ են պատանդների ազատ արձակման վերաբերյալ բանակցությունների հարցում նրա վերաբերմունքին, պահանջում են բոլոր պատանդների անհապաղ ազատ արձակում, հաղորդում է The Times of Israel-ը։

Ցուցարարները փակել են «Լիկուդ» շենքին հարակից փողոցների երթևեկությունը, փորձել են կրակ վառել և բախվել ոստիկանության հետ։ Ցուցարարների մի խումբ կարողացել է մտնել շենք և փորձել է այնտեղ բարիկադավորվել։ Ոստիկանությունն անօրինական է հայտարարել անկարգության վերածված գործողությունը և բռնի ուժով ցրել բոլոր ցուցարարներին։ Ձերբակալվել է 62 մարդ։

Ըստ ոստիկանության մամուլի ծառայության՝ ամբոխը ցրելու ժամանակ վիրավորվել է երկու ոստիկան։