«Թուրքիան ակնկալում է, որ Իրանը կաջակցի Զանգեզուրի միջանցքի հետ կապված քայլերին»․ Էրդողան

Թուրքիան ցանկանում է, որ ՀՀ-ի և Ադրբեջանի միջև խաղաղության պայմանագրի ստորագրման գործընթացը հնարավորինս շուտ ավարտվի։ Այս մասին հայտնել է Թուրքիայի նախագահ Ռեջեփ Թայիփ Էրդողանը։

«Մենք գոհունակությամբ ողջունում ենք Ադրբեջանի և Հայաստանի միջև ձեռնարկված քայլերը։ Խաղաղության պայմանագրի տեքստի շուրջ համաձայնությունը համարում ենք կայունության ճանապարհին նշանակալի առաջընթաց։ Ցանկանում ենք, որ այս գործընթացն ավարտվի որքան հնարավոր է շուտ»,- ասել է Թուրքիայի նախագահը։

«Մենք անցնում ենք Հայաստանի հետ հարաբերությունների կարգավորման աստիճանական գործընթացով։ Մենք կտեսնենք, որ մեր երկրները կշահեն դրանից», ասել է Թուրքիայի նախագահը՝ հույս է հայտնելով, որ Իրանը նույնպես կօգնի այդ հարցում։

«Թուրքիան ակնկալում է, որ Իրանը կաջակցի Զանգեզուրի միջանցքի հետ կապված այն քայլերին, որոնք կնպաստեն տարածաշրջանում խաղաղությանը, կայունությանը և զարգացմանը»,- ասել է Էրդողանը։