Քալիֆորնիայի նահանգապետն իրեն ձերբակալելու` Թրամփի կոչն անվանել է «քայլ դեպի ավտորիտարիզմ»

Քալիֆորնիայի նահանգապետ Գևին Նյուսոմը նախագահ Դոնալդ Թրամփի կողմից իր ձերբակալման կոչն անվանել է «քայլ դեպի ավտորիտարիզմ»։

«Միացյալ Նահանգների նախագահը կոչ արեց ձերբակալել գործող նահանգապետին։ Հուսով էի, որ երբեք այս օրը չեմ տեսնի Ամերիկայում։ Անկախ նրանից՝ դեմոկրատ եք, թե հանրապետական, սա այն սահմանն է, որը մենք՝ որպես երկիր, չենք կարող հատել։ Սա հստակ քայլ է դեպի ավտորիտարիզմ», - գրել է Նյուսոմը իր X (նախկինում՝ Twitter) էջում։

Երկուշաբթի օրն ավելի վաղ Դոնալդ Թրամփը, մեկնաբանելով Լոս Անջելեսում և Սան Ֆրանցիսկոյում տեղի ունեցած անկարգությունների ալիքը, ասել էր, որ եթե ինքը պատասխանատու լիներ իրավապահ մարմինների համար, կձերբակալեր Քալիֆորնիայի նահանգապետին։ Նա նաև խստորեն դատապարտել է ցուցարարների գործողությունները՝ նրանց անվանելով «պրոֆեսիոնալ սադրիչներ»։