Ադրբեջանում ռուսական գործակալության ևս մեկ լրագրող է ձերբակալվել

Ադրբեջանում ձերբակալվել է ևս մեկ լրագրող՝ ռուսական Ruptly գործակալության խմբագիր Այտեկին Հուսեյնովան։ Այս մասին հայտնել է գործակալության Telegram ալիքը։

Հաղորդվում է, որ նա նկարահանել է «Sputnik Ադրբեջանի» գրասենյակում հունիսի 30-ի կեսօրին տեղի ունեցած խուզարկություններն ու ձերբակալությունները։

«Նա դեպքի վայր էր ժամանել մոտավորապես ժամը 16:00-ին։ Վերջին անգամ կապ է հաստատել ժամը 16:20-ին՝ հաղորդելով, որ նկարահանել է նյութը»,- հայտնել է գործակալությունը։

Լրագրողի մայրը հաստատել է նրա ձերբակալությունը։

Ruptly-ն «Russia Today» մեդիահոլդինգի մաս կազմող RT հեռուստաալիքի բաժինն է։ «Russia Today»-ը ղեկավարում են Դմիտրի Կիսելյովը և Մարգարիտա Սիմոնյանը։ Sputnik գործակալությունը նույնպես այս հոլդինգի մաս է կազմում։