«Իսրայելի կողմից նոր հարվածներ են սպասվում»․ Փեզեշքիան

Իսրայելի կողմից Իրանի վրա նոր հարվածներ են սպասվում։ Այս մասին, իրանական լրատվամիջոցների փոխանցմամբ, հայտնել է Իրանի նախագահ Մասուդ Փեզեշքիանը՝ մատնանշելով երկրի անվտանգության հետ կապված խնդիրները։

Իսրայելի կողմից Իրանի վրա նոր ռազմավարական հարվածներ նախապատրաստելու մասին հաղորդագրությունների ֆոնին, Իրանի նախագահը խոստովանել է ազգային անվտանգության համակարգում լուրջ խնդիրների առկայությունը։

Ելույթ ունենալով կառավարության նիստում ՝ նա ասել է.

«Պարզվեց, որ մենք խնդիրներ ունենք անվտանգության ոլորտում»։

Իրանցի լրագրողներից մեկի հրապարակած տեղեկատվության համաձայն՝ Ազգային անվտանգության խորհրդի կողմից նահանգապետերին ուղարկված «հույժ գաղտնի» փաստաթուղթը պարունակում է Իսրայելի հնարավոր ավիահարվածների մասին հատուկ նախազգուշացումներ։

Նամակում նաև նշվում է ամերիկյան ռազմական բազաներում անօդաչու թռչող սարքերի ակտիվության աճի և իսրայելական թիրախների՝ իրանցի գեներալների և ռազմավարական օբյեկտների «երկրորդ ցուցակի» առկայության մասին։

Խորհուրդը կոչ է արել բոլոր ռազմական կառույցներին բարձրացնել իրենց պատրաստվածության մակարդակը՝ առանց բնակչության շրջանում խուճապ տարածելու։