«ԱՄՆ-ն պատրաստ է նպաստել Թայլանդ-Կամբոջա բանակցություններին». Ռուբիո

ԱՄՆ պետքարտուղար Մարկո Ռուբիոն հեռախոսազրույց է ունեցել Կամբոջայի ԱԳ նախարար Պրակ Սոխոնի և Թայլանդի ԱԳ նախարար Մարիս Սանգյամպոնգսայի հետ՝ ընդգծելով, որ Միացյալ Նահանգները պատրաստ է օգնել տարածաշրջանում լարվածությունը նվազեցնելու նպատակով երկու երկրների միջև բանակցություններին, հայտնում է ԱՄՆ Պետդեպարտամենտը։
Պետդեպարտամենտի տվյալներով՝ առանձին զանգերի ընթացքում Ռուբիոն կոչ է արել Կամբոջայի և Թայլանդի իշխանություններին՝ անհապաղ թուլացնել լարվածությունը և դադարեցնել կրակը։

«Միացյալ Նահանգները պատրաստ է նպաստել ապագա բանակցություններին՝ Թայլանդի և Կամբոջայի միջև խաղաղություն և կայունություն ապահովելու համար», - ասվում է Պետդեպարտամենտի կայքում հրապարակված հայտարարության մեջ։
Ավելի վաղ Մալայզիայի «Բերնամա» լրատվական գործակալությունը, հղում անելով երկրի արտաքին գործերի նախարար Մոհամադ Հասանին, հայտնել է, որ Կամբոջայի վարչապետ Հուն Մանեթը և Թայլանդի վարչապետի պաշտոնակատար Ֆումտհամ Վեչայչայը հուլիսի 28-ին կժամանեն Մալայզիայի մայրաքաղաք Կուալա Լումպուր՝ երկու երկրների միջև հակամարտությունը քննարկելու համար։
Հիշեցնենք՝ Թայլանդի և Կամբոջայի միջև սահմանային լարվածությունը մտել է զինված փուլ՝ հուլիսի 24-ի առավոտյան։