«Թրամփի սպառնալիքները չեն կարող նպաստել ռուս-ամերիկյան հարաբերությունների կարգավորմանը»․ Զախարովա

Ռուսաստանի դեմ ԱՄՆ նախագահ Դոնալդ Թրամփի սպառնալիքները չեն կարող նպաստել Մոսկվայի և Վաշինգթոնի միջև հարաբերությունների կարգավորմանը։ Այս մասին հայտնել է ՌԴ ԱԳՆ խոսնակ Մարիա Զախարովան։

«Ոչ մի սպառնալիք, անկախ նրանից՝ ում կողմից է այն հնչեցվում, չի կարող դրական ազդեցություն ունենալ կարգավորման գործընթացի վրա։ Սա պարզապես տեսական պատասխան է գործնական հարցին։ Տեսական, քանի որ դա բնության օրենք է»,- ասել է Զախարովան՝ նշելով, որ սպառնալիքների լեզուն անհամատեղելի է հարաբերությունների կարգավորման հետ։

Զախարովայի խոսքով՝ ՌԴ նախագահի աշխատակազմն արդեն արձագանքել է Թրամփի խոսքերին։

«Հայտարարվել է, որ մեր երկիրը հաշվի է առել Վաշինգթոնի հայտարարությունը»,- հիշեցրել է Զախարովան։

ԱՄՆ նախագահը հայտարարել էր, որ Ռուսաստանին և Ուկրաինային 50 օր կտա համաձայնության հասնելու համար, որից հետո մտադիր է 100 տոկոս մաքսատուրքեր սահմանել Մոսկվայի և նրա առևտրային գործընկերների նկատմամբ։

Երկուշաբթի Թրամփը հայտարարել էր, որ հիասթափված է Ռուսաստանից և կարգավորման գործընթացում առաջընթացի բացակայությունից, ուստի կրճատում է ժամկետը մինչև 10-12 օր։