«Կողմերի հետ շարունակական խորհրդակցություններ են անցկացվում»․ Արաղչի

Միջանցքի հարցն ամբողջությամբ մի կողմ է դրվել, խոսքը տարանցիկ երթուղու մասին է, որը կլինի Հայաստանի ինքնիշխանության և իրավասության ներքո՝ նրա տարածքում։ Այս մասին հայտարարել է Իրանի արտաքին գործերի նախարար Աբբաս Արաղչին։

Նրա խոսքով՝ իրանական կողմը բազմաթիվ քննարկումներ է ունեցել Հայաստանի և Ադրբեջանի հետ։

«Ինձ կզանգահարի Հայաստանի արտաքին գործերի նախարարը։ Կզանգահարի նաև Հայաստանի վարչապետ պարոն Փաշինյանը, իսկ երեքշաբթի նախատեսված է Հայաստանի փոխարտգործնախարարի այցը Թեհրան։ Մենք շարունակական խորհրդակցություններ ենք անցկացնում կողմերի հետ»,- ասել է Արաղչին։

Իրանի ԱԳՆ ղեկավարը նշել է, որ «Զանգեզուրի և բարձրացված հարցերի վերաբերյալ» իր երկրի դիրքորոշումը միանգամայն պարզ է. Իրանը ողջունում է Հայաստանի և Ադրբեջանի միջև ցանկացած խաղաղություն և նախկինում հայտարարել է համագործակցելու և երկու երկրների միջև խաղաղության գործընթացը խթանելու հարցում իր պատրաստակամության մասին։

«Իրանի սկզբունքային դիրքորոշումները մինչ այժմ հարգվել են, սակայն ամերիկյան ընկերության հնարավոր ներկայությունը մտահոգիչ է, և Թեհրանը կշարունակի խորհրդակցություններն այս հարցի շուրջ»,- հայտնել է Արաղչին։