«Բելառուսական զենքն օգտագործվել է ԼՂ-ում՝ հայերի դեմ»․ #OCCRP

762

Չորեքշաբթի, 27 օգոստոսի, 2025 թ., 15:36

Բելառուսից գնված զենքն օգտագործվել է հայկական ուժերի դեմ՝ 2020 թվականին Լեռնային Ղարաբաղի շուրջ Ադրբեջանի հետ պատերազմի ժամանակ։ Այս մասին նշվել է Կազմակերպված հանցավորությունը և կոռուպցիան լուսաբանող ծրագրի (Organized crime and Corruption Reporting Program, OCCRP) հետազոտությունում:

Հետազոտության մեջ նշվում է, որ բացահայտումները հատկապես զգայուն են Հայաստանի համար, քանի որ Բելառուսը պաշտոնապես համարվում է ՀՀ-ի դաշնակիցը. երկուսն էլ Հավաքական անվտանգության պայմանագրի կազմակերպության (ՀԱՊԿ) անդամ են։

Չնայած այս դաշինքին՝ մասնավոր բելառուսական զենքի արտադրող Tetraedr-ը վաճառել է սարքավորումներ և ծառայություններ, որոնք Ադրբեջանին թույլ են տվել արդիականացնել իր հակաօդային համակարգերը։ Այս մասին են վկայում ընկերության էլեկտրոնային նամակներն ու ներքին զեկույցները։

Tetraedr-ի ներքին զեկույցներից մեկում նշվել է, որ Ադրբեջանի կողմից գնված հակաօդային պաշտպանության համակարգն «ակտիվորեն օգտագործվել է» վեցշաբաթյա հակամարտության ընթացքում հայկական անօդաչու թռչող սարքերը ոչնչացնելու համար։