Երկուշաբթի, 12 հունվարի, 2026 թ.
|
Ստեփանակերտում`   +6 °C

«Մեծամորի ատոմակայանը տարածաշրջանի համար վտանգ չի ներկայացնում». Զախարովա

«Մեծամորի ատոմակայանը տարածաշրջանի համար վտանգ չի ներկայացնում». Զախարովա
1143
Ուրբաթ, 29 օգոստոսի, 2025 թ., 20:24

Ռուսաստանը պատրաստ է Հայաստանին առաջարկել ատոմային էներգիայի զարգացման տարբերակներ՝ փոքր մոդուլային ռեակտորներից մինչև ապացուցված և հուսալի տեխնոլոգիաների վրա հիմնված նոր խոշոր կայանի կառուցում։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Մենք տեսնում ենք հայկական կողմի շահագրգռվածությունը խաղաղ ատոմային ոլորտում համագործակցությունը շարունակելու հարցում։ Մեծամորի ԱԷԿ-ի հիմնադրումից ի վեր կես դար շարունակ մեր մասնագետները սերտորեն փոխանակվել են փորձով», - ընդգծել է Զախարովան։

Նրա խոսքով՝ «Ռոսատոմը» իր հայ գործընկերների հետ համատեղ ներկայումս աշխատում է գործող կայանի շահագործումը մինչև 2036 թվականը երկարաձգելու ուղղությամբ, ինչպես նաև քննարկում է նոր էներգաբլոկների կառուցման հեռանկարները։

Զախարովան հայտնել է, որ «Ռոսատոմի» ղեկավարությունը կանոնավոր կապ է պահպանում երկրի կառավարության հետ՝ նշելով, որ Ռուսաստանն արձանագրում է արևմտյան երկրներից որոշ անբարյացակամների կողմից միջուկային ոլորտում ռուս-հայական համագործակցությունը վարկաբեկելու փորձեր։

Մասնավորապես, լրատվամիջոցները տարածում են կեղծ լուրեր ատոմակայանի անխուսափելի վթարի կամ տարածաշրջանի համար դրա կողմից ենթադրաբար լուրջ սպառնալիքի մասին։

«Մեծամորի ատոմակայանը կառուցվել է հատուկ Հայաստանի համար՝ հաշվի առնելով հանրապետության սեյսմոլոգիական և կլիմայական առանձնահատկությունները, և կայանի անվտանգությունը բազմիցս հաստատվել է Ատոմային էներգիայի միջազգային գործակալության կողմից», - ասել է Զախարովան։