«Եթե հնարավոր չլինի, որ Տիգրանաշենը մնա ՀՀ-ին, Արծվաշենը՝ Ադրբեջանին, ապա պետք է հրաժարվենք նաև Արծվաշենից»․ Հովիկ Աղազարյան

«Վարչապետը վերջերս հայտարարեց, որ սահմանների ճշգրտման և սահմանազատման գործընթացի արդյունքում հետ ենք բերեու Արծվաշենը և մեր հողերը, որոնք այսօր գտնվում են Ադրբեջանի ԶՈՒ-ի վերահսկողության տակ։ Եթե դա մի քիչ ուրիշ ձևով ձևակերպենք, ապա նշանակում է, որ մենք Ադրբեջանին տալու ենք Տիգրանաշենը»,- այս մասին ԱԺ-ում իր ելույթի ժամանակ նշեց ԱԺ պատգամավոր Հովիկ Աղազարյանը։

Նրա դիտարկմամբ՝ Ադրբեջանը չի ձգտում մեր մոդելով խաղաղության։ «Խաղաղության մեր մոդելը խաղաղությունը, բարիդրացիական հարաբերությունների զարգացումն է, իրենց մոդելը ուրիշ է՝ իրենց մոդելը հայոց պետականության վերացումն է։ Եթե այդպես չէ, Տիգրանաշենն իրենց ինչի՞ն է պետք։ Տիգրանաշենն իրենց պետք է միայն ռազմավարական նպատակներով»,- նշեց պատգամավորը։
«Ես մի սարսափելի միտք կասեմ,- հավելեց Աղազարյանը,-եթե կառավարությունը չկարողանա բանակցությունների ընթացքում հասնել նրան, որ Տիգրանաշենը մնա Հայաստանին, Արծվաշենը՝ Ադրբեջանին՝ հաշվի առնելով հանրաքվեները, Սահմանադրության պահպանումը, ապա պետք է ուրիշ բան անել, որովհետև վստահ եմ՝ անկլավների փոխանակումից հետո առաջ է գալու Ադրբեջանից Հայաստան փախստականներ վերադարձի խնդիրը․․․ Եվ շատ դժվար կլինի․․․ Եթե հնարավոր չլինի, որ Տիգրանաշենը մնա Հայաստանին, Արծվաշենը՝ Ադրբեջանին, ապա մենք պետք է հրաժարվենք նաև Արծվաշենից՝ որպես բողոք, որպես անվստահություն Ադրբեջանի և Թուրքիայի կողմից վարվող քաղաքականության, և դա կարող է հնարավորություն տալ ժամանակավոր՝ 20-30 տարով հետաձգել փախստականների վերադարձի խնդիրը, մինչև կայուն խաղաղություն հաստատվի»։