Ավստրալիայում ուժի մեջ է մտել սոցիալական ցանցերի` աշխարհում առաջին արգելքը երեխաների համար

Ավստրալիայում ուժի մեջ է մտել աշխարհում առաջին օրենքը, որն արգելում է 16 տարեկանից փոքր երեխաներին սոցիալական ցանցեր մուտք գործելը։ Հարթակները արգելափակել են դրանց մուտքը՝ մինչև 49.5 միլիոն ավստրալական դոլար (33 միլիոն ԱՄՆ-ի դոլար) տուգանքների սպառնալիքով, հաղորդում է Reuters-ը։

Օրենքն ընդունվել է 2024 թվականի նոյեմբերին։ Սոցիալական ցանցերի սեփականատերերին մեկ տարի ժամանակ է տրվել տարիքային ստուգման մեթոդ մշակելու և 16 տարեկանից փոքր ավստրալացիների մուտքն իրենց հարթակներ արգելելու համար։ Վարչապետ Էնթոնի Ալբանեզեն հայտարարել է, որ օրենքը նպատակ ունի աջակցելու երիտասարդներին և նվազեցնելու լրատվական հոսքերի և ալգորիթմների կողմից գործադրվող ճնշումը։ Նա խորհուրդ է տվել երեխաներին նոր սպորտաձևով զբաղվել, գիրք կարդալ և ժամանակ անցկացնել ընտանիքի և ընկերների հետ՝ հեռախոսներով ժամանակ անցկացնելու փոխարեն։

Արգելքը ներկայում վերաբերում է 10 սոցիալական ցանցերի, բայց կառավարությունը կթարմացնի ցանկը, երբ նոր հարթակներ ի հայտ գան։ Գրեթե բոլոր ընկերությունները հայտարարել են, որ կստուգեն օգտատերերի տարիքը սելֆիների միջոցով։ Նրանք կարող են նաև ստուգել վերբեռնված փաստաթղթերի կամ բանկային քարտերի միջոցով։