«ԶԱԷԿ-ը մնում է Ուկրաինայի հարցով ԱՄՆ-ի խաղաղության ծրագրի ամենաբարդ հարցերից մեկը». Զելենսկի

Զապորոժիեի ատոմակայանը (ԶԱԷԿ) մնում է Ուկրաինայի հարցով ԱՄՆ-ի խաղաղության ծրագրի ամենաբարդ հարցերից մեկը։ Կողմերը ներկայում փնտրում են փոխզիջում։ Այս մասին հաղորդում է РБК-Украина-ն՝ հղում կատարելով Ուկրաինայի նախագահ Վլադիմիր Զելենսկիի՝ լրագրողների հետ հանդիպման ժամանակ արած հայտարարություններին։

Զելենսկին նշել է, որ Զապորոժիեի ատոմակայանը խաղաղության ծրագրի նախագծի 12-րդ կետն է։ ԱՄՆ-ի առաջարկն այն է, որ Զապորոժիեի ատոմակայանը շահագործվի համատեղ երեք երկրների՝ Ուկրաինայի, ԱՄՆ-ի և Ռուսաստանի կողմից։

«Ռուսները կարծում են, որ իրենք ամեն դեպքում այնպես կանեն, որ Զապորոժիեի ատոմակայանը (ԶԱԷԿ) շահագործվի իրենց կողմից։ Նրանք այս կայանի շահագործումը կկապեն մարդասիրական ասպեկտի հետ։ Նրանք կասեն. «Եկեք վերականգնենք ամբարտակը, եկեք վերագործարկենք էլեկտրաէներգիան»։ Այդ պատճառով էլ գործընկերներն ասում են, որ ցանկանում են համատեղ կառավարման մեխանիզմ», - նշել է Զելենսկին։

Նրա խոսքով՝ Ուկրաինայի փոխզիջումային դիրքորոշումն այն է, որ Զապորոժիեի ԱԷԿ-ը շահագործվի ԱՄՆ-ի և Ուկրաինայի կողմից՝ 50/50 հարաբերակցությամբ։

«Արտադրված էլեկտրաէներգիայի 50%-ը կտրվի Ուկրաինային, իսկ մնացած 50%-ի բաշխումը Միացյալ Նահանգներն ինքնուրույն կորոշի», - ասել է Զելենսկին։

Նա հավելել է, որ կայանի տարածքը, ինչպես նաև Էներգոդարը և Կախովկա հիդրոէլեկտրակայանը պետք է ապառազմականացվեն։