Գիտնականները պարզել են՝ քնի ընթացքում ուղեղի ակտիվությամբ կարելի է որոշել, թե որքան արագ է ծերանում ուղեղը

Գիտնականները պարզել են, որ քնի ընթացքում ուղեղի ակտիվությամբ կարելի է որոշել, թե որքան արագ է ծերանում ուղեղը և որն է դեմենցիայի զարգացման ռիսկը: Եթե այսպես կոչված «ուղեղի տարիքը», որը հաշվարկվում է էլեկտրաենցեֆալոգրաֆիայի ազդանշաններով, գերազանցում է մարդու իրական տարիքը, հիվանդության հավանականությունը նկատելիորեն մեծանում է: Աշխատանքը հրապարակվել է JAMA-ում։

Հետազոտությանը մասնակցել է 40-ից 94 տարեկան մոտ 7000 մարդ։ Նրանց հետևել են մինչև 17 տարի, որի ընթացքում մոտ 1000 մասնակցի մոտ զարգացել է դեմենցիա։ Վերլուծությունը ցույց է տվել, որ ուղեղի «ծերացման» յուրաքանչյուր լրացուցիչ 10 տարին գրեթե 40 տոկոսով մեծացնում է հիվանդության առաջացման ռիսկը։

Ընդ որում առանցքային են եղել ոչ թե քնի ստանդարտ ցուցանիշները, ինչպիսին է տևողությունը, այլ ավելի նուրբ բնութագրերը՝ ուղեղի ալիքների կառուցվածքը: Հենց դրանք են արտացոլում հիշողության գործընթացները, վերականգնումը և ուղեղի ընդհանուր առողջությունը, որոնք ավանդական չափանիշները հաճախ բաց են թողնում:

Հեղինակները նշում են, որ ապագայում նման տեխնոլոգիաները կարող են օգտագործվել նույնիսկ կլինիկական միջավայրից դուրս, օրինակ՝ կրելի սարքերի միջոցով: Սա թույլ կտա ավելի վաղ հայտնաբերել դեմենցիայի ռիսկը և ժամանակին կատարել կենսակերպի փոփոխություններ, այդ թվում՝ բարելավել քնի որակը: