Նորվեգացի տղամարդը մեկուկես հազար տարեկան սրի պատյանի ոսկե զարդ է գտել

Նորվեգիայի հարավ-արևմուտքում առավոտյան զբոսանքի դուրս եկած տղամարդը պատահաբար չափազանց հազվագյուտ և արժեքավոր գտածո է հայտնաբերել՝ սրի պատյանի ոսկե զարդ։ Տղամարդու խոսքով ՝ ինքը չի հասկացել, թե ինչ առարկա է գտել, բայց կռահել է, որ դա ինչ-որ հին ու արժեքավոր բան է, ուստի գտածոն հանձնել է Ստավանգերի համալսարանի հնագիտական թանգարանին: Հնագետները եկել են այն եզրակացության, որ մ.թ. 6-րդ դարի այս ոսկե արտեֆակտը ժամանակին զարդարել է ռազմական արիստոկրատիայի ներկայացուցչի թրի պատյանը:

Գիտնականները ենթադրում են, որ պատյանի ոսկե երեսպատումը պատահաբար չի կորել. այն դիտավորյալ տեղադրվել է ժայռի ճեղքում՝ որպես զոհաբերություն աստվածներին դժվարին ժամանակներում, ինչպես նաև այն առաջնորդի կարգավիճակն ու իշխանությունը հաստատելու համար, որին այն պատկանել է։ Նման պրակտիկան լայնորեն տարածված էր այդ դարաշրջանի Սկանդինավիայում։