«Ֆիթնես կենտրոնների համար կսահմանվեն չափորոշիչներ, մարզիչները պետք է ունենան հավաստագիր»․ Ժաննա Անդրեասյան

Ֆիթնես կենտրոնների համար կսահմանվեն չափորոշիչներ: Դրանք կգործեն որոշման նախագծի ընդունումից հետո 1 տարի ժամանակահատվածում։ Այս մասին այսօր կառավարության նիստում նշեց ԿԳՄՍ նախարար Ժաննա Անդրեասյանը՝ ներկայացնելով համապատասխան որոշման նախագիծը։

«Համապատասխան կարգավորումներ են սահմանվել օդափոխության, սանհանգույցի, ջրամատակարարման, բնական կամ արհեստական լուսավորության, անհրաժեշտության դեպքում՝ բժշկական ծառայությունների հասանելիության մասով: Իհարկե, սահմանվում է նաև, որ ֆիթնես կենտրոնների մարզիչները պետք է ունենան հավաստագիր»,- ասաց նախարարը՝ հավելելով, որ նախաձեռնությունը մի քանի փուլով քննարկվել է ոլորտի ավելի քան 40 կազմակերպությունների ներկայացուցիչների հետ: