Քոչարյանը 2 ժամանոց ելույթ է ունեցել. դատական նիստն ավարտվեց
 180 Ուրբաթ, 01 փետրվարի, 2019 թ., 18:40 Քիչ առաջ ավարտվեց Քոչարյանի կալանքի փոփոխության հարցով դատական նիստը, պաշտպան Հայկ Ալումյանը լրագրողների հետ զրույցում ասաց հետևյալը. «Քոչարյանը մանրամասն ներկայացրեց փետրվարի 23-ի դրությամբ ստեղծված իրավիճակը, այն, որ բանակում և ԵԿՄ-ում խմորումներ էին սկսվել, որ իրենք միանան ցուցարարներին, և այդ վիճակում ինքը հրավիրել և բանավոր ցուցում է տվել ՊՆ նախարարին, որ ինքը ապահովի բանակի չեզոքությունը: Քոչարյանի ելույթը տևել է ուղիղ 2 ժամ: 0038 հրամանին անդրադարձ եղել է, Քոչարյանը հստակեցրել է, որ ինքը այդ հրամանի հետ ծանոթացել է և տեսել, որ դրա մեջ ոչ մի սխալ, վատ բան չկա: Բացի այդ, ոչ իր ժամանակ, ոչ էլ ինչ-որ մի այլ նախագահի ժամանակ ՊՆ հրամանները չեն ուղարկվել նախագահին, որպեսզի նա ծանոթանա, նոր այն ուժի մեջ մտնի: Այդպիսի պրակտիկա երբևիցե չի եղել: ՀՔԾ-ի ամենամեծ խախտումներից մեկը (ի դեպ նա շատ լուրջ խախտումներ է արել) դա է: 10 զոհերի համար շատ ցավում ենք, բայց պետք է ԱԱԾ-ն ու ՀՔԾ-ն այնպիսի քայլեր անեն, որ երևա, որ իրենք իրոք ուզում են սպանության մեղավորներին գտնել, ոչ թե այդ հուզական կողմը օգտագործել այլ նպատակներով: Քոչարյանին մեղսագրվում է բանակը ներգրավելու հանգամանքը, բայց, համենայն դեպս, մինչև մարտի 1-ը Երևանում ոչ ռազմական դրություն է եղել, որ էլ բանակն է ներգրավվել»: Թե ինչու է արտակարգ դրություն սահմանվել, Հայկ Ալումյանը պատասխանեց. «Հստակ եղել են փաստեր, որ ցուցարարների կողմից բռնություններ են կիրառվել ոստիկանների նկատմամբ և այլ կարևոր հանգամանքներ են զեկուցվել, որոնք չեմ կարող մանրամասնել: Այդ հանգամանքներից ելնելով հայտարարվել է արտակարգ դրություն»: Ի դեպ, թե ով է պատասխանատվություն կրում, Քոչարյանը չի մատնանշել, նա անուններ չի տվել: Իսկ դատական նիստը կրկին հետաձգվել է, այն տեղի կունենա փետրվարի 4-ին ժամը 12:00-ին: |
