Ստամբուլում իր աշխատանքն սկսեց աշխարհի ամենամեծ օդանավակայանը

Ստամբուլի՝ Աթաթուրքի անվան օդանավակայանը, որը երկար տարիներ համարվում էր ամենամեծը երկրում, վերջնականապես դադարեցրեց իր գործունեությունը: Դրա վերջին թռիչքը ուղղություն վերցրեց դեպի Սինգապուր:

Ստամբուլի եվրոպական հատվածում արդեն գործում է նոր օդանավակայան, որը ամենամեծն է աշխարհում: Այն բացվել է 2018 թվականի հոկտեմբերի 29-ին՝ Թուրքիայի Հանրապետության 95-ամյակի օրը: Նոր օդանավակայանը չի կրի Աթաթուրքի անունը, այն պարզապես կկոչվի Ստամբուլի միջազգային օդանավակայան: Դրա շինարարության վրա ծախսվել է ավելի քան 11 միլիարդ դոլար:

Թուրքական իշխանությունները հույս ունեն, որ այն կդառնա աշխարհում ամենամեծն ուղևորահոսքի առումով՝ տարեկան սպասարկելով 150 միլիոն ուղևորի: 2028-ին նախատեսվում է ներդնել 6 թռիչքուղի, ու ուղևորահոսքը հասցնել 200 միլիոնի:

Նոր օդանավակայանից առաջին պաշտոնական չվերթը մեկնել է դեպի երկրի մայրաքաղաք Անկարա:

Գործարկումից առաջ հին օդանավակայանից 5 հազար բեռնատարներով 50 տոննա սարքավորում են տեղափոխել նոր օդանավակայան: Գործընթացը տևել է 12 ժամ, այդ ողջ ընթացքում 2 օդանավակայաններն էլ չեն աշխատել: