Չորեքշաբթի, 22 ապրիլի, 2026 թ.
|
Ստեփանակերտում`   +15 °C

Գիտնականները լուրջ կասկածներ ունեն՝ երեխաները կորոնավիրուսից տառապում են, բայց՝ այլ կերպ

Գիտնականները լուրջ կասկածներ ունեն՝ երեխաները կորոնավիրուսից տառապում են, բայց՝ այլ կերպ
2199
Ուրբաթ, 01 մայիսի, 2020 թ., 23:00

Բրիտանացի բժիշկներն ուսումնասիրում են կորոնավիրուսի համավարակի և երեխաների մոտ ավելի ու ավելի հաճախ հանդիպող ծանր բորբոքային հիվանդությունների միջև կապը: Երեխաները հիվանդանոց են ընդունվում բարձր ջերմությամբ ու բորբոքված անոթներով: Հիվանդությունը կոչվում է Կավասակի, որն ախտահարում է փոքր ու միջին անոթները, արտահայտվում է տենդով, մաշկի լորձաթաղանթի փոփոխություններով և անոթների ախտահարումով, որոնք կարող են առաջացնել թրոմբոզներ ու պատռվածքներ:

Առողջապահության նախարար Մեթ Հենքոքը ճեպազրույցի ժամանակ իր լուրջ մտահոգությունն է հայտնել և ասել, որ համապատասխան օրգանները լրջորեն հետազոտում են այդ խնդիրը:

Ընդ որում, Իտալիայում մեկ ամսում անոթների ծանր բորբոքմամբ հիվանդանոց է դիմել ավելի քան 20 պացիենտ, ինչը 6 անգամ ավելի է սովորական ցուցանիշից: Այդ երեխաներից միայն մի քանիսն են վարակված եղել կորոնավիրուսով: Առաջիկայում գիտնականներն ու բժիշկները պետք է ապացուցեն՝ արդյոք այս երկու հիվանդությունները կապ ունեն իրար հետ:

Կավասակի հիվանդությունը 16 տարի առաջ դարձյալ կապվում էր մեկ այլ կորոնավիրուսի հետ, թեև ծանրակշիռ ապացույցներ չեն գտնվել: