«Ցանկանում եմ դիմել Մայր Հայաստանում ու աշխարհի տարբեր ծայրերում սփռված արցախցիներին». Արցախի թեմի առաջնորդ

«Հավաքվել ենք այստեղ՝ առաջին հերթին ինքներս մեզ, ապա արտաքին աշխարհին ցույց տալու մեր միասնականությունն ու վճռականությունը և կարող ենք արձանագրել, որ այս հարցում հաջողել ենք»,- Ստեփանակերտի հրապարակում բազմահազարանոց հանրահավաքի ժամանակ հայտարարեց Հայ առաքելական եկեղեցու Արցախի թեմի առաջնորդ Վրթանես եպիսկոպոս Աբրահամյանը: «Ինչպե՞ս պետք է լինի մեր ազգի փրկությունը. այս նեղությունները հաճախ մեզ օգնում են սթափվելու, միավորվելու և փրկության ուղիներ փնտրելու, բայց այս ամենն ինքնանպատակ ու անպտուղ չպետք է լինի, այլ առիթ տա գործնական ու շոշափելի քայլերի»,- ասաց նա: Նրա խոսքով՝ եթե Արցախյան վերջին պատերազմում հաղթեինք, այսօր կանգնած չէինք լինի այսպիսի դժվարությունների առջև: «Ցանկանում եմ դիմել Մայր Հայաստանում ու աշխարհի տարբեր ծայրերում սփռված արցախցիներին. վերադարձե՛ք Արցախ ու տեր կանգնեք ձեզ վստահված այս սրբազան մասունքին: Արցախում, նախքան պատերազմը, եթե ունենային առնվազն կես մլն հայություն, 2020թ. պատերազմի ժամանակ կունենայինք լրիվ այլ պատկեր»,- նշեց Արցախի թեմի առաջնորդը: