«Ադրբեջանական քարոզչադաշտը լծված է «վերադարձի հայեցակարգի» մշակմամբ». Տաթևիկ Հայրապետյան

ԱԺ նախկին պատգամավոր, ադրբեջանագետ Տաթևիկ Հայրապետյանը գրում է. «Իսկ դուք գիտե՞ք, որ երբ Ալիևն ասում է «պետք է հայեցակարգ մշակենք վերադառնալու դեպի Արևմտյան Ադրբեջան», նա նկատի ունի ՀՀ–ի՝ ոչ միայն Սյունիքի, Գեղարքունիքի, Վայոց Ձորի մարզերն ու մայրաքաղաք Երևանը, այլ ամբողջ ՀՀ–ն՝ ներառյալ Լոռիի, Շիրակի ու անգամ Կոտայքի մարզերը: Այժմ ադրբեջանական քարոզչադաշտը լծված է «վերադարձի հայեցակարգի» մշակմամբ: Նրանց լրատվամիջոցները հրապարակում են շինծու բնաչության թվաքանակ, լուսանկարներ: Մեջլիսի պատգամավորները ոգևորված խոսում են, որ «սա 44-օրյա պատերազմից հետո Ալիևի հաջորդ մեծ ձեռքբերումն է լինելու»: Մի խոսքով, իջեցվել է հրահանգ, կատարվում է աշխատանք: Որքան էլ անհեթեթ է թվում այս ամենը, բայց ցավոք, նման հարևան ունենք՝ ծավալապաշտ, հայատյաց ու ռազմատենչ: Ուստի պետք է մեր անելիքները հասկանանք, ոչ թե անհեթեթ բաներ քննարկենք:
Ի՞նչ կարող ենք մենք անել: Առնվազն կարճաժամկետ կտրվածքով պատրաստվենք Բաքվի և Սումգայիթի ջարդերի տարելիցներին: Մենք ունենք հսկայական փաստական հիմք՝ Բաքվի վայրագությունները տեղեկատվական, դիվանագիտական և այլ ճակատներով ներկայացնելու համար: Երկարաժամկետ կտրվածքով ավելի կոնցեպտուալ հայեցակարգերի կարիք կա, որոնց միգուցե այլ առիթով անդրադառնամ»: