«Հարցը պետք է լուծվի պետության կողմից, ոչ թե բուժաշխատողների հաշվին». Գևորգ Գրիգորյան

Օրեր առաջ բժիշկ Գևորգ Գրիգորյանը ֆեյսբուքյան իր էջում հայտնել էր. «Փետրվարի 23-ին, ժամը 11:00-ին լինելու ենք Ազգային ժողովի մոտ և նամակներ ենք հանձնելու բոլոր խմբակցություններին, ինչպես նաև ԱԺ նախագահին՝ առողջության համապարփակ պարտադիր ապահովագրության բացերի և ռիսկերի վերաբերյալ խորհրդարանական լսումներ կազմակերպելու դիմումով»:

Ակցիան մեկնարկել է: Այս պահին լրագրողների հարցերին է պատասխանում Գևորգ Գրիգորյանը: «Ուզում ենք, որ ապահովագրական համակարգը գործի, բայց արդյունավետ գործի, չոտնահարվեն բուժաշխատողների շահերը»,- ասաց Գրիգորյանը՝ հավելելով. «Մեր պահանջն է, որպեսզի փոխեն վճարման կարգը, նվազագույն շեմը փոփոխեն, բուժաշխատողի վարձատրման մեխանիզմը վերահաշվարկեն, և թող աշխատի ապահովագրական համակարգը, դա իրոք հարց է լուծելու մեր երկրի բնակիչների համար, ուղղակի էդ հարցը պետք է լուծվի պետության կողմից, ոչ թե բուժաշխատողների հաշվին»: