«Շտապել է պետք». Հրանտ Վարդանյան

Կինոռեժիսոր Հրանտ Վարդանյանը ֆեյսբուքյան իր էջում գրում է. «Ավելի լավ առիթ, որպեսզի աշխարհին ասենք, հասկացնենք, թե Հայաստանի համար ինչ է նշանակում ռուս-թուրքական տանդեմը՝ չէր կարող լինել, քան շրջափակումն է։
Մեր լրատվամիջոցները, դիվանագիտական, քաղաքական բոլոր ռեսուրսներն, աշխարհի տարբեր լեզուներով վերլուծություններ չեն անում, չեն ներկայացնում այդ տանդեմի կոմերցիոն, աշխարհաքաղական վտանգների մասին, ուղիղ չեն դատապարտում ՌԴ-թուրքական միասնությունը։
Այսօր աշխարհի տարբեր անկյուններում, Երևանում երթեր են, կոչեր են, նույն կոչերն անում են միջազգային կառույցները, արցախցիները։
Տեսեք Ալիևն ինչքան գումար և ռեսուրս է ծախսում՝ աշխարհի աչքերում թոզ փչելու համար, իր սուտը ճշմարտության տեղ անցկացնելու համար։
Այսօր ՎՎՊ քայքայված է, ՌԴ ճողվել է բոլոր առումներով, Էրդողանի ապագան մշուշոտ է, իսկ մենք որպես պետություն՝ դեռ հստակ խոսք, շրջադարձային ուղիղ քայլ, դիմում համաշխարհային հասարակությանն ուղղված չենք անում։ Հստակ և անվերադարձ չենք հրաժարվում երեսունամյա ծուռ ճանապարհից՝ քոռ դանակով ինքներս մեզ ենք մորթում, մեր վախերով, կասկածներով հոգնեցնում բոլորին։
Հ․Գ․
Եթե եռակողմ պայմանավորվածության երկու կողմերը միասին խաղտում են պայմանագիրը, ուրեմն մենք պետք է հիմնովին հրաժարվենք այդ փաստաթղթից, երկու կողմին էլ որպես սուբյեկտ համաշխարհային արենայում դատապարտենք, զրոյացնենք՝ օգտագործելով մեզ հասու բոլոր միջոցները։ Շտապել է պետք, ամեն վայրկյանն այսօր՝ նախորդ դարի մեկ տարվա պարունակություն ունի։
Հայաստանը մանրադրամ են սարքել, մեր բարեկամ-թշնամի հորդաները, որոնց հետ համաձայնվել են, դրանց օգտին գործել են՝ դրանց ենթարկվող հայերը։ Շտկելու ժամանակն է, սուվերենության գիտակցությունը՝ օրվա խնդիր դարձնելու, դրան հասնելու ժամանակն է»։