«ԽՍՀՄ վարչական սահմանները «կադաստրի սահմաններ» չեն». Մհեր Հակոբյան

360

Չորեքշաբթի, 24 մայիսի, 2023 թ., 21:42

Ռազմաքաղաքական հարցերի վերլուծաբան Մհեր Հակոբյանը ֆեյսբուքյան իր էջում գրել է. «Նիկոլ Փաշինյանի խոսքով՝ Հայաստանը՝ որպես պետություն, իր բազմահազարամյա գոյության ընթացքում երբեք ԿԱԴԱՍՏՐԻ ՎԿԱՅԱԿԱՆ չի ունեցել. «Եթե այն, ինչ որ մենք ուզում ենք անել, ստացվի, մենք ՊԱՏՄՈՒԹՅԱՆ ՄԵՋ ԱՌԱՋԻՆ ԱՆԳԱՄ ԿՍՏԱՆԱՆՔ ԿԱԴԱՍՏՐԻ ՎԿԱՅԱԿԱՆ, սեփականատեր կլինենք ոչ միայն դե ֆակտո, այլև դե յուրե. մենք ուզում ենք հաղթահարել տնվորի մեր հարգավիճակը»:
Այս կապակցությամբ ասեմ, պարոն Փաշինյան.
- Հայաստանը, ձեր կենցաղային պարզունականացված խոսքով ասած, իր «կադաստրի վկայականը» առաջին անգամ ստացել է դեռևս մ.թ.ա. III հազարամյակում, երբ շումերա-աքքադական աղբյուրները ֆիքսում են հայերի, հայերի պետականության և հայոց լեզվի ԱՌԿԱՅՈՒԹՅՈՒՆԸ ՀԱՅԿԱԿԱՆ ԼԵՌՆԱՇԽԱՐՀՈՒՄ,
- Հաջորդ հազարամյակներում հայերը, Հայաստանը և Հայոց պետականությունը ԲԱԶՄԻՑՍ են հաստատել, կրկին ձեր տերմինլոգիայով ասած, իրենց «կադաստրային իրավունքները» հայ ժողովրդի պատմական Հայրենիքի նկատմամբ,
- Վերջին անգամ Հայաստանի՝ Հայոց պետականության, «կադաստրի վկայականը» ՎԵՐԱՀԱՍՏԱՏԵԼ Է, հենց այդպես, այլ ոչ թե. «տվել է», ՄԱԿ-ի իրավանախորդ Ազգերի լիգան՝ դեռևս 1920 թվականին,
- ԽՍՀՄ վարչական սահմանները, կրկին ձեր կենցաղային պարզունականացված խոսքով ասած, «կադաստրի սահմաններ չեն», դրանք իրենց տակ որևէ իրավական հիմք չունեցող, ըստ էության ՕԿՈՒՊԱՆՏ ՈՒԺԻ ԿՈՂՄԻՑ ԳԾՎԱԾ ՍԱՀՄԱՆՆԵՐ ԵՆ,
- Հայաստանը՝ Հայոց պետականությունը, ձեր այդ անհաջող կիրառած տերմինով ասեմ, իր «կադաստրի վկայականը» չպետք է ստանա, կոնկրետ դեպքում ԽՆԴՐԻ կամ ՄՈՒՐԱ թուրք-ադրբեջանական տանդեմից: Ընդհանրապես, «կադաստրային իրավունքներ» ազգերը չեն ստանում, ազգերը դրանք ձեռք են բերում ու դրանց ԱՐԺԱՆԻ ԵՆ ԼԻՆՈՒՄ իրենց թափած ջանքերի և, ամենից առաջ, հաջող պետականաշինական գործունեության արդյունքում:
Իսկ վերջում ամենակարևորը.
- Պարոն Փաշինյան, թույլ տվեք ձեզ ասել, որ, եթե աշխարհի նույնիսկ ամենաուժեղ կադաստրային կնիք-ստորագրությամբ հաստատված ամենաերկաթյա կադաստրային վկայականն էլ ՀՀ որևէ ղեկավար ունենա, բայց տակը ՈՒԺԵՂ ՊԵՏԱԿԱՆՈՒԹՅՈՒՆ չունենա, թուրք-ադրբեջանական տանդեմը ԿՍՐԲԻ այդ ղեկավարի «կադաստրային սեփականությունը», իսկ վերջում էլ, որպես հատուկ ծաղրի մի միջոց, անձամբ նույն այդ ղեկավարին կնվիրի նույն այդ կադաստրային վկայականի թուղթը՝ գեղեցիկ տուփի մեջ, կարմիր ժապավենով կապված, որպեսզի ՀՀ նույն այդ անհաջողակ ղեկավարը կադաստրային այդ վկայականը անձնական-հիգիենիկ կարիքների համար օգտագործի – դրանից ավել որևէ բանի համար այդ թղթի կտորը պետք չի գա, սրանում վստահ եղեք:
Շնորհակալություն ուշադրության համար»:

Աղբյուրը` Մհեր Հակոբյան