«Ուշագրավ հաղորդագրություն է տարածել ՌԴ-ում Հայաստանի դեսպանությունը»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Ուշագրավ բովանդակությամբ հաղորդագրություն է տարածել Ռուսաստանում Հայաստանի դեսպանությունը: Ըստ այդմ, նորանշանակ դեսպան Գուրգեն Արսենյանը հանդիպել է ՌԴ Պետդումայի Դաշնային ժողովի Դաշնության խորհրդի պաշտպանության և անվտանգության կոմիտեի նախագահ Վիկտոր Բուլավինի հետ։

«Հանդիպման սկզբում դեսպան Արսենյանը զրուցակցին փոխանցեց Հայաստանի Հանրապետության ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի ջերմ բարեմաղթանքները։

Փոխըմբռնման և կառուցողական աշխատանքի պատրաստակամության մթնոլորտում անցած հանդիպման ընթացքում քննարկվեցին անվտանգային ոլորտում միջխորհրդարանական փոխգործակցությանը վերաբերող հարցեր՝ ընդգծելով նշյալ ոլորտում միջխորհրդարանական երկխոսության շարունակականության պահպանման կարևորությունը», ասվում է հաղորդագրության մեջ:

Ուշադրության արժանին, ինչպես երևի թե կռահեցիք, Անդրանիկ Քոչարյանի «ջերմ բարեմաղթանքների» հատվածն է: Եվ ուշադրության արժանի է բնականաբար Քոչարյանի շուրջ այս օրերին ծավալված ներիշխանական խմորումների ֆոնին:

Ջերմ բարեմաղթանքի փաստն ինքնին արտառոց չէ, ի վերջո խորհրդարանական գործընկեր է, կարող էլինել նաև մարդկային ջերմ հարաբերություն եւ ըստ այդմ՝ առիթի դեպքում բարեմաղթանք:

Հատկանշականը այն է սակայն, որ այդ դրվագը տեղ է գտնում դեսպանության տարածած հաղորդագրության մեջ, այլ կերպ ասած՝ հարկ է համարվում հանրայնացնել դա:

Կա՞ այստեղ որևէ կորելացիա Քոչարյանի շուրջ խմորումների հետ, փնտրո՞ւմ է Անդրանիկ Քոչարյանը Ռուսաստանում որեւէ աջակցություն ՔՊ-ում իր դիրքերի ամրության համար:

Այս հաղորդագրությունն իհարկե բացի վերը նշածս հանգամանքից, ուշադրության է արժանի նաև մեկ այլ ասպեկտով: Մասնավորապես, հայ-ռուսական տիրույթում կարծես թե շատ երկար ժամանակ բացակայում էր որևէ հաղորդակցություն անվտանգության եւ պաշտպանության թեմայով:

Եվ ահա, նորանշանակ դեսպանը հանդիպում է ունենում Պետդումայի վերին պալատի պրոֆիլային հանձնաժողովի ղեկավարի հետ: Սա նշանակո՞ւմ է արդյոք, որ Երևանը մտադիր է առնվազն որոշակիորեն «հալեցնել» այդ ոլորտում Ռուսաստանի հետ սառեցրած հարաբերությունը, թեկուզ խորհրդարանական խողովակով:

Թե՞ դա միայն դեսպան Արսենյանի նախաձեռնությունն է, որով նա փորձում է իր դիվանագիտական աշխատանքը սկսել ակտիվության նկատելի ռեժիմով: Համենայն դեպս արժե հետևել, թե արդյո՞ք այդտեղ կլինի որևէ նոր զարգացում:

Ընդհանուր առմամբ, այս հարցն իհարկե տեղեկատվա-քարոզչական տրենդներից ու նարատիվներից դուրս, իրականում բավականին բազմաշերտ և բարդ հարց է: Ինչպես առիթ եմ ունեցել ասելու, հարաբերության կամ կոմունիկացիայի սառեցումն ըստ իս առնվազն լռելյայն մակարդակում պայմանավորված է փոխադարձ ընդունելիության հանգամանքով:

Միաժամանակ, այն իհարկե ենթակա է անվտանգության լայն միջավայրում իրողությունների և հարաբերությունների դինամիկ փոփոխության ազդեցությանը»: