«Հույս ունեմ՝ ՌԴ-ն որևէ կերպ չի փորձի միջամտել ՀՀ ընտրություններին»․ Սարգիս Խանդանյան

ԱԺ արտաքին հարաբերությունների հանձնաժողովի նախագահ Սարգիս Խանդանյանը, լրագրողների հետ զրույցում անդրադառնալով հարցին՝ հիմա Հայաստանը գնո՞ւմ է Եվրոպա, թե՞ ոչ, և արդյո՞ք այնտեղից ազդակներ կան, որ ցանկություն ունեն մեզ ընդունելու, պատասխանեց. «Ես կարող եմ միանշանակ ասել, որ Հայաստանը ցանկանում է խորացնել և խորացնում է իր հարաբերությունները ԵՄ-ի հետ: Եվ ԵՄ-ն, թե՛ որպես միություն և թե՛ անդամ երկրները առանձին, այդ ազդակին դրական են արձագանքում՝ այն որոշումների կայացմամբ, որոնք վերջին ամիսների և տարիների ընթացքում մենք ականատես ենք եղել և որոնք առաջիկայում սպասվում են: Ես հույս ունեմ, որ այդ հարաբերությունները ավելի կխորանան»:

Խանդանյանի խոսքով՝ մասնավորապես ակնկալվում է գործընկերության նոր օրակարգի ստորագրումը Հայաստանի և ԵՄ-ի միջև, որ այս օրերին բանակցվում է․ «Այս օրերին արդեն կիմանանք նաև եվրոպական դիտորդական առաքելության մանդատի երկարաձգման մասին»,- նշեց նա:

Խանդանյանը, անդրադառնալով ՀՀ ներքին կյանքին արտաքին միջամտությունների վերաբերյալ դիտարկմանը, հույս հայտնեց, որ ՌԴ-ն, որպես գործընկեր երկիր, որևէ կերպ չի փորձի միջամտել ՀՀ ընտրություններին։