«Զելենսկին նամակ չի փոխանցել Թրամփին»․ Զելենսկու մամուլի քարտուղար

Վլադիմիր Զելենսկին ոչ մի նամակ չի փոխանցել ԱՄՆ նախագահ Դոնալդ Թրամփին, հայտնել է Զելենսկու մամուլի քարտուղար Սերգեյ Նիկիֆորովը։
«Զելենսկուց ոչ մի նամակ չի եղել, Թրամփը խոսում էր սոցիալական ցանցում արված գրառման մասին»,- ասել է Նիկիֆորովը՝ ի պատասխան ուկրաինական Liga.net-ի հարցմանը։
Իր հերթին, ԱՄՆ-ում Ուկրաինայի դեսպան Օքսաննա Մարկարովան սոցցանցում պարզաբանել է, որ Քոնգրեսին ուղղված իր ելույթի ժամանակ հիշատակելով Զելենսկու «կարևոր նամակը», Թրամփը նկատի ուներ Ուկրաինայի նախագահի՝ X-ում արված երեկվա գրառումը, որտեղ նա հայտնել էր, որ պատրաստ է հաշտություն կնքել և առաջարկել է սկսել գերիների ազատ արձակումից և կրակի դադարեցումից։ Ընդ որում, ԱՄՆ նախագահից ներողություն նա չի խնդրել։

Ավելի վաղ հաղորդվել էր, որ Թրամփը կարևոր նամակ է ստացել Զելենսկուց, որտեղ նա ասում է, որ պատրաստ է բանակցել հակամարտության կարգավորման շուրջ։