«Եթե համակարգված գործենք, ոչ միայն Ադրբեջանը, այլև շատերը մեզ հետ հաշվի կնստեն». Արամայիս Աղաբեկյան

Արցախի ԱԺ պատգամավոր Արամայիս Աղաբեկյանի ֆեյսբուքյան գրառումը. «2013 կամ 2014 թվականն էր, երբ ես առաջին անգամ ծանոթացա ադրբեջանցի երիտասարդների հետ։ Եվրոպական միության աջակցությամբ ընթացող ծրագրի շրջանակներում Ավստրիայի Շլայնինգ քաղաքում շատ հետաքրքիր դասընթաց էր կազմակերպվել։ Ադրբեջանցիներն առաջին օրը ներկայացան՝ գրեթե բոլորը Եվրոպական հայտնի կրթական հաստատությունների սաներ, իսկ մենք կամ ԱրՊՀ-ում էինք սովորել, կամ՝ մաքսիմում երևանյան ինչ-որ բուհում։
Սկզբում մտածեցի՝ երևի հարուստ ընտանիքներից են, հատուկ են ուղարկել, որպեսզի տպավորություն թողնեն։ Մեծ էր զարմանքս, երբ իմացա, որ միջին և աղքատ ընտանիքների երեխաներ են, կրթություն ստացել կամ ստանում են Հեյդար Ալիևի ֆոնդի միջոցով, և որ հետագա իրենց գործունեությունը կապում են հայրենիքին հետագայում ծառայելու հետ։
Այս լրջագույն կրթական ցենզի տարբերությունն, իհարկե, մեծ դեր մեր շփման մեջ չխաղաց։ Երբ գործը հասնում էր բանավեճերին, էնտուզիազմի, ճկունության և խորամանկության հաշվին խեղճացնում էի, բայց մի բան, այնուամենայնիվ, ֆիքսեցի։
Նրանք այդ պահին արդեն ավելի պատրաստ էին, քան մենք, և անհատական շուստրիությանը դիմակայում էր համակարգ՝ պետության հովանու ներքո։
Ասածս ինչ է՝ մինչև համակարգեր չունենանք, մինչև աղքատ և միջին կարողության ընտանիքների երեխաներին սովորելու, կրթվելու և հայրենիքին ծառայելու ռեսուրսներ և մոտեցումներ չգտնենք, ոչինչ չի ստացվելու։ Նրանք մեզնից թույլ են, ուղղակի գործում են համակարգված։ Եթե մենք էլ նույնը անենք, վստահ եղեք՝ ոչ թե միայն Ադրբեջանը, այլև շատ-շատերը մեր հետ հաշվի կնստեն»: