Զելենսկին առաջարկել է երկարաձգել զինադադարը

Ուկրաինան առաջարկում է երկարաձգել Պուտինի առաջարկած Զատկի զինադադարը։ Այս մասին հայտարարել է Ուկրաինայի նախագահ Վլադիմիր Զելենսկին։

«Ուկրաինան կգործի հայելային կերպով՝ ճիշտ այնպես, ինչպես դա կլինի ռուսական կողմից․ լռություն՝ ի պատասխան լռության, հարվածներ՝ ի պատասխան հարվածների։ Եթե ​​իսկապես լիակատար լռություն տիրի, Ուկրաինան առաջարկում է զինադադարը երկարաձգել՝ ապրիլի 20-ին Զատկի ավարտից հետո: Սա ցույց կտա Ռուսաստանի իրական մտադրությունները, քանի որ 30 ժամը բավարար է վերնագրեր ապահովելու համար, բայց ոչ բավարար վստահության ապահովման իրական միջոցների համար: Երեսուն օրը կարող է խաղաղության հնարավորություն տալ», - գրել է Զելենսկին իր Telegram ալիքում:

Հիշեցնենք՝ ՌԴ նախագահ Վլադիմիր Պուտինը Զատկի առթիվ հրադադար էր հայտարարել՝ ապրիլի 19-ի ժամը 18:00-ից մինչև ապրիլի 21-ի ժամը 00:00-ն։ Պուտինի խոսքով՝ զինադադարն առաջարկվում է «մարդասիրական նկատառումներով» և ենթադրում է, որ Ուկրաինան կհետևի Ռուսաստանի օրինակին։