Գիտնականները հայտնաբերել են Երկիր մոլորակից դուրս հնարավոր կյանքի «ամենածանրակշիռ ապացույցները»

Քեմբրիջի համալսարանի գիտնականները Առյուծի համաստեղությունում գտնվող K2-18b էկզոմոլորակի մթնոլորտում հայտնաբերել են օրգանական երկու միացություն, որը կարող է դառնալ Երկրից դուրս կյանքի բավականին ծանրակշիռ ապացույց: Այս մասին, հղում կատարելով Astrophysical Journal գիտական ամսագրին, իր հարթակում հայտնում է Քեմբրիջի համալսարանը:
2023 թվականին Տիեզերքի ուսումնասիրությամբ զբաղվող ամերիկյան NASA կազմակերպությունը «Ջեյմս Ուեբի» աստղադիտակի օգնությամբ К2-18b մոլորակի մթնոլորտում արդեն հայտնաբերել էր մեթան և ածխաթթու գազ:
Վերջին նոր արդյունքները ևս ստացվել են «Ջեյմս Ուեբի» աստղադիտակի միջոցով:

Երկիր մոլորակի վրա դիմեթիլ սուլֆիդ (DMS) և դիմեթիլ դիսուլֆիդ (DMDS) քիմիական միացությունները արտադրվում են միայն կենդանի օրգանիզմների՝ ծովային միկրոօրգանիզմների կողմից:
«Թեև K2-18b-ի մթնոլորտում առկա այս մոլեկուլները կարող են լինել ինչ-որ անհայտ քիմիական գործընթացի արդյունք, այնուհանդերձ, այս բացահայտումը դարձել է մեր Արեգակնային համակարգից դուրս կյանքի առկայության ամենածանրակշիռ ապացույցը»,- նշվում է հոդվածում:

Թեև այս հայտնագործությամբ Երկիր մոլորակից դուրս կյանքի առկայությունը դեռևս չի հաստատվում, սակայն սրանք երբևէ եղած ամենալուրջ ապացույցներն են, որ ստացել է մարդը, որոնց ստույգ լինելու հավանականությունը ներկայումս հասնում է 99.7%-ի:

K2-18b-ն, որը գտնվում է Երկրից 124 լուսատարի հեռավորության վրա, համարվում է «Հիսեան» տիպի մոլորակ՝ օվկիանոսներով ծածկված և ջրածնով հարուստ մթնոլորտով։