«Միջնորդներն Իսրայելին և ՀԱՄԱՍ-ին նոր առաջարկ են ներկայացրել»․ #BBC

731

Երեքշաբթի, 22 ապրիլի, 2025 թ., 16:27

Իսրայելի և ՀԱՄԱՍ-ի միջև բանակցություններում Քաթարի և Եգիպտոսի միջնորդները Գազայի հատվածում պատերազմի ավարտի նոր պայմաններ են առաջարկել, հայտնում է BBC-ն՝ վկայակոչելով պաղեստինցի պաշտոնյային։

Ըստ աղբյուրի՝ նախաձեռնությունը ներառում է զինադադար՝ 5-7 տարի ժամկետով, իսրայելցի բոլոր պատանդների ազատ արձակում՝ իսրայելական բանտերում պահվող պաղեստինցի բանտարկյալների դիմաց, պատերազմի պաշտոնական ավարտ և իսրայելական զորքերի դուրսբերում Գազայի հատվածից։
Հաղորդվում է, որ ՀԱՄԱՍ-ը նույնպես պատրաստակամություն է հայտնել Գազայի հատվածի վերահսկողությունը հանձնել պաղեստինյան ցանկացած կազմակերպության, որը համաձայնեցված կլինի «ազգային և տարածաշրջանային մակարդակներով», օրինակ՝ Պաղեստինի ինքնավարությանը, որը ներկայումս պատասխանատու է Արևմտյան ափի կառավարման համար։ Իսրայելի վարչապետ Բենիամին Նեթանյահուն ավելի վաղ բացառել էր Պաղեստինի ինքնավարության ցանկացած մասնակցությունը Գազայի հատվածի կառավարմանը:

Գործակալությունը լուրջ է որակել միջնորդական ներկայիս ջանքերը՝ նշելով, որ ՀԱՄԱՍ-ը ցուցաբերել է «աննախադեպ ճկունություն»։

Գազայի հակամարտության կարգավորման նոր պայմանները ներկայացվել են, երբ ՀԱՄԱՍ-ը մերժել էր 45-օրյա հրադադարի դիմաց 10 պատանդների ազատ արձակելու Իսրայելի վերջին առաջարկը։