«ԱՄՆ-ն ցանկություն է հայտնել վերսկսել բանակցությունները»․ Իրանի ԱԳ փոխնախարար

Թեհրանը միջնորդների միջոցով տեղեկատվություն է ստացել ԱՄՆ-ի՝ Իրանի հետ բանակցությունները վերսկսելու ցանկության մասին, հայտարարել է Իրանի փոխարտգործնախարար Մաջիդ Թախտ-Ռավանչին։
«ԱՄՆ նախագահ Դոնալդ Թրամփի կառավարությունը միջնորդների միջոցով Իրանին տեղեկացրել է, որ ցանկանում է վերադառնալ բանակցություններին, սակայն չի պարզաբանել իր դիրքորոշումը բանակցությունների ընթացքում Իրանի վրա հետագա հարձակումների «շատ կարևոր հարցի» վերաբերյալ»,- նրա խոսքերն է մեջբերում ISNA-ն։
Ռավանչիի խոսքով, եթե ԱՄՆ-ն ցանկանում է վերսկսել բանակցություններն Իրանի հետ, ապա պետք է երաշխավորի, որ ապագայում չի հարձակվի Իրանի վրա։ Հնարավոր բանակցությունների համար դեռևս ամսաթվեր չկան, հավելել է Իրանի փոխարտգործնախարարը։

Հիշեցնենք՝ Իրանը և ԱՄՆ-ն Իրանի միջուկային ծրագրի շուրջ Օմանի միջնորդությամբ անուղղակի բանակցությունների հինգ փուլ են անցկացրել։ Վեցերորդ փուլը պետք է տեղի ունենար հունիսի 15-ին, որը չեղարկվել էր՝ Իրան-Իսրայել հակամարտության պատճառով։