«Եթե գտնում եք՝ բարձրագույն կրթությունը ֆիկտիվ է, պատգամավորների դեպքում էլ կարելի է հանել»․ Բաբկեն Թունյան

«Անշարժ գույքի շուկայով զբաղվող անձինք պետք է գրագիտության որոշակի մակարդակ ունենան»,- ռիելթորական գործունեության մասին նախագծի քննարկման ժամանակ ասաց ՔՊ-ական պատգամավոր Բաբկեն Թունյանը։
Նշված օրենքով սահմանվում է ՀՀ-ում ռիելթորական գործունեության իրականացման կարգը և պայմանները, ինչպես նաև կանոնակարգում են ռիելթորական գործունեությանն առնչվող հարաբերությունները:
Օրենքով նախատեսվում է, որ ռիելթորը պետք է ունենա բարձրագույն կրթություն և համապատասխան որակավորման վկայական։
ՔՊ-ական պատգամավոր Արման Եղոյանը արձագանքեց, որ չկա այնպիսի ֆակուլտետ, որտեղ ռիելթորի մասնագիտություն են ստանում, ուստի նրանց համար պարտադիր բարձրագույն կրթության նորմ հաստատելը տեղին չէ։ «Նույն հաջողությամբ առևտրի ոլորտի այլ մասնագետների համար նման նորմ պետք է սահմանենք։ Մեր հասարակության 50%-ը բարձրագույն կրթություն չունի և դա նորմալ է։ Մարդը, ով 10 տարի զբաղվում է ռիելթորի գործունեությամբ, բայց չունի բարձրագույն կրթություն, չի կարողանալու աշխատել»,- ասաց Եղոյանը։
Բաբկեն Թունյանը հակադարձելով Եղոյանին՝ պնդեց, որ կա գրագիտության որոշակի մակարդակ, որի երաշխիքը բարձրագույն կրթությունն է։ «Եթե գտնում եք, որ բարձրագույն կրթությունը ֆիկտիվ է, պատգամավորների դեպքում էլ կարելի է հանել»,- հավելեց Թունյանը։