«Մենք չենք ասում, որ Թրամփի ուղին» պետք է գործի Ադրբեջանի համար անընդունելի պայմաններով»․ Նիկոլ Փաշինյան

«Սոցիալական ցանցերում մեծ քննարկում էր առաջացրել Ադրբեջանի մի ներկայացուցչի այն հայտարարությունը, որ «Թրամփի ուղին» պետք է գործի Ադրբեջանի համար ընդունելի պայմաններով»,- այս մասին խորհրդարանում հարցուպատասխանի ժամանակ նշեց վարչապետ Նիկոլ Փաշինյանը։

«Մենք չենք ասում, որ Ադրբեջանի համար անընդունելի պայմաններով պետք է գործի, և մենք թուղթ ենք ստորագրել ընդունելի պայմանների մասին․․․ Մինչև տարվա վերջ մենք թղթի վրա պետք է նկարագրենք բոլոր մանրամասները։ 2026 թվականի առաջին կեսին պետք է համաձայնեցնենք, երկրորդ կեսին սկսենք շինարարական աշխատանքները․ սա է պլանը․․․ Բայց ես այս մասին չէի ուզում խոսել, քանի որ այսպիսի պլանները միշտ ժամկետների շեղում են ունենում։ Բայց հայկական կողմն ամեն ինչ կանի, որ ժամանակացույցը հստակ աշխատի»,- նշեց վարչապետը։

Փաշինյանը նաև հայտարարեց, որ հստակ է, թե երկաթուղին որտեղով է անցնելու․ «Այն անցնելու է ԽՍՀՄ ժամանակ գոյություն ունեցած երկաթուղով։ Ուրիշ տեղով երկաթուղի կառուցելն անիրատեսական է։ Գազամուղը և էլեկտրական գծերն անցնելու են երկաթուղուց էականորեն հյուսիս»։